1. maí 2009
GlaxoSmithKline (GSK) styður ríkisstjórnir og heilbrigðisyfirvöld víða um heim við að bregðast við hinum nýja stofni af inflúensu A (H1N1)
Fyrirtækið hefur þróað nokkrar meðferðir sem það telur geta dregið úr áhrifum og útbreiðslu þessarar nýju inflúensuveiru. Þar á meðal má nefna veirusýkingalyfið Relenza (zanamivír), talsverðir möguleikar og ný tækni við bólusetningar, s.s. notkun nýrra ónæmisglæða.
Til að tryggja stöðugar birgðir og framleiðslu á nauðsynlegum lyfjum og bóluefnum hefur GSK einnig virkjað eigin viðbragðsáætlun við farsóttum.
Relenza (zanamivír)
Frá því að fuglaflensan (H5N1) braust út árið 2003 hefur GSK unnið með yfirvöldum við að tryggja fólki aðgang að Relenza, til notkunar í heimsfaraldri inflúensu. Algengt er að Relenza sé notað til að auka fjölbreytni í lyfjaforða yfirvalda, og sem viðbót við birgðir þeirra af Tamiflu (oseltamivír).
Relenza hefur verið selt til 26 landa á síðustu sex árum í þeim tilgangi að byggja upp lyfjaforða komi til inflúensufaraldurs og er lyfið að meðaltali um 13% af lyfjaforða þessara landa. Síðasta stóra pöntunin á Relenza sem gerð var áður en þessi nýi inflúensufaraldur kom upp, var 10,6 milljónir meðferðarskammta sem afhentir voru breskum yfirvöldum í apríl síðastliðnum.
Í tengslum við hinn nýja stofn af inflúensu A (H1N1) hefur Alþjóðaheilbrigðismálastofnunin (WHO) greint frá því að veirur fengnar frá nýlegum tilvikum hjá mönnum væru næmar fyrir oseltamivíri og zanamivíri en þolnar gagnvart amantadíni og remantadíni.1
Vegna þessa hefur GSK sett sig í samband við ríkisstjórnir um allan heim til að ganga úr skugga um hversu mikil þörf er fyrir Relenza. Meðal þeirra ríkja voru Mexíkó og Bandaríkin, sem til þessa hafa farið verst út úr inflúensunni. Í kjölfarið hefur GSK sett af stað aðgerðaráætlun sem felst í að stýra dreifingu á þeim lyfjabirgðum sem til eru og að auka framleiðslu:
• GSK hefur aukið framleiðslu á Relenza og stefnir nú að því að framleiða 50-60 milljónir meðferðarskammta á ári. Fyrirtækið býst við að ná þessum framleiðsluhraða (5 milljónir skammta á mánuði) innan næstu 12-14 vikna.
• Þann 23. apríl 2009 hafði GSK afgreitt allar fyrirliggjandi pantanir á Relenza fyrir almennan markað og til hins opinbera. Fyrirtækið á nú 6 milljónir meðferðarskammta af Relenza á lager. GSK hefur sett dreifingu til stjórnvalda í forgang og vinnur með þeim að því finna þær leiðir sem best henta til að koma lyfinu til almennings, hvort sem það er í gegnum hið opinbera eða á almennum markaði.
• Fyrirtækið starfar áfram náið með stjórnvöldum víða um heim við að byggja upp birgðir af Relenza. Þeim lyfjabirgðum sem til eru verður dreift samkvæmt ákveðnu úthlutunarferli og ný framleiðsla verður afhent í þrepum.
• Til að auka framleiðslu enn frekar hefur GSK átt í viðræðum við ýmis önnur framleiðslufyrirtæki. Sem hluta af þessari áætlun er GSK einnig að skoða annan búnað sem nota má til að taka Relenza, fyrir utan Diskhaler-tækið sem nú er samþykkt. GSK stefnir á viðræður við skráningaryfirvöld um þessi mál innan skamms, með hugsanlega flýtiafgreiðslu í huga.
• GSK vinnur með kínverska framleiðslufyrirtækinu Simcere Pharmaceuticals að því að auka enn frekar framleiðslugetu á Relenza. Árið 2006 veitti GSK Simcere leyfi til að framleiða og selja vörur sem innihalda zanamivír í Kína og víðar, þar á meðal til 50 fátækustu ríkja heims.
• GSK gerir ráð fyrir að ráðstafa hluta af nýrri framleiðslu til 50 fátækustu ríkja heims, annað hvort beint eða í gegnum alþjóðlegar hjálparstofnanir. Að auki lýsir fyrirtækið sig reiðubúið til að veita öðrum framleiðslufyrirtækjum leyfi til að framleiða og bjóða upp á lyf sem innihalda zanamivír til notkunar í þróunarlöndum.
Þróun bóluefna
Rannsókna- og þróunarstarf GSK á bóluefnum er mjög virkt og felur m.a. í sér þróun á bóluefnum gegn inflúensu sem getur orðið að heimsfaraldri og bóluefnum gegn heimsfaraldri inflúensu og notkun nýrrar tækni eins og ónæmisglæða.
Árið 2008 varð GSK fyrst fyrirtækja til að fá Evrópuleyfi fyrir bóluefni gegn inflúensu sem getur orðið að heimsfaraldri, Prepandrix. Bóluefnið er hannað til að að styrkja varnir fólks gegn nokkrum stofnum H5N1-veirunnar. Sama ár fékk GSK einnig Evrópuleyfi fyrir Pandemrix, sem er grunnur að væntanlegu bóluefni gegn heimsfaraldri inflúensu. Þetta samþykki, sem var byggt á upplýsingum sem tengdust H5N1-inflúensuveirunni, mun flýta fyrir skráningu á mögulegu bóluefni gegn heimsfaraldri inflúensu af völdum annarra stofna, þar á meðal H1N1.
GSK hefur verið í stöðugu sambandi við WHO, sóttvarnareftirlit og heilbrigðiseftirlit Bandaríkjanna og Sóttvarnarstofnun Evrópu til að öðlast betri skilning á hinum nýja stofni inflúensu A (H1N1). Að ósk þessara aðila hefur GSK miðlað upplýsingum og mannafla og vinnur með þeim að því að meta framleiðslugetu, tímasetningu framleiðslu og notkun ónæmisglæða við framleiðslu á mögulegum bóluefnum gegn heimsfaraldri inflúensu.
GSK er viðbúið að hefja framleiðslu á mögulegu bóluefni gegn hinum nýja stofni inflúensu A (H1N1) um leið og WHO og önnur opinber heilbrigðisyfirlit gefa út leiðbeinandi fyrirmæli um samsetningu á slíku bóluefni.
Á meðan, og í samræmi við fyrirmæli frá WHO og öðrum heilbrigðisyfirvöldum, heldur GSK áfram að framleiða og hámarka birgðir sínar af bóluefni gegn árstíðabundinni inflúensu; fyrst til notkunar á suðurhveli jarðar þar sem vetur er í þann mund að hefjast og síðar á árinu fyrir norðurhvelið.2 Þetta mun áfram vera forgangsmál hjá GSK þar sem árstíðabundin inflúensa veldur sýkingu hjá 5-15% jarðarbúa og um 500.000 dauðsföllum á ári hverju.3
Lykilstaðreyndir
GlaxoSmithKline - eitt af leiðandi rannsóknarfyrirtækjum í heiminum á sviði lyfja og heilsugæslu – skuldbindur sig til að bæta lífsgæði fólks með því að gera því kleift að áorka meiru, líða betur og lifa lengur.
Relenza meðferðarpakki inniheldur innöndunartæki (Diskhaler), ásamt fimm Rotadisk-skífum sem hver inniheldur fjóra skammta af lyfinu Relenza. Skammtur fyrir eina meðferð er sem hér segir: tveir innöndunarskammtar að morgni og tveir að kvöldi (þ.e. ein skífa á dag í fimm daga).
Heimildir
2. WHO, Fréttatilkynning 29. apríl 2009
Prentvæn útgáfa